Napas Buatan

Satu kali begini, anak kecil dengan de pu mama jalan ke pasar mo belanja. Trus anak itu de lihat ada gambar orang baku cium.
De langsung tanya : “Mama,mama.. itu gambar apa ka?
De mama bilang : “O … itu gambar perempuan de kehabisan napas, jadi de pu teman kasi napas buatan!”.
Anak de langsung bilang : “Mama.. kemarin bapa ada kasi napas buatan untuk mama adek”.
E.. mama de mara sekali, langsung de batariak.. “O.. sa harus pi palungku ko pu bapa ini…”
Akhirnya mereka dua tida jadi belanja, abis mama de su meter!!

(dari Caci di PSW  Merauke, PAPUA)

 

Pica Proyek

Ini dari Manado. Jadi sa harap jang ada yang tersinggung. Just kidding.

Ada istri supir taksi de kase tau de pe laki, sore-sore begitu.

Istri: “Napa torang pe tetangga so lebe hebat ya. Dorang so beli kulkas, tv, deng de pe segala macam. Kong torang dang bolom dapa apa2?”

Kong de pe laki bilang: “Tunggu jo ada 2 kita pe proyek yang so mo pica”.

De pe maitua langsung semangat : “Proyek apa dang itu!!??”.

De pe laki jawab : “Kalo bukan ngana pe mata yang pica, ngana pe bibir yang kita mo kasi pica, habis ngana so terlalu maniso!!!”.

(Ado Caci ko pu mob bikin kaka tamba rindu kampong. Salam untuk Nina  ya).

 

Lebaran Mangga

Pace deng Mace dong pigi keliling kampung mo kasi selamat lebaran untuk dong pu tetangga muslim. Tau2 begini ada nona satu de lewat di jalan, baku dapat deng pace mace dorang. Pace mata langsung hijo memang. De putar otak, aha..dapat! Orang Inggris bilang “Bingo”.

Pace : “Ado pohon mangga e..ko pu bua manis sekali”

Nona de tersipu malu.

Mace de heran, memang ada pohon mangga tapi tarada bua, kan blom musim mangga. Trus de tanya sama pace.

Mace : “E..pace mana ada mangga kan blom musim mangga. Hanya daun saja itu. Ko tipu saya ya?”

Pace muka mera, trus de bilang begini:

Pace : “Blimbing busuk ko diam saja”.

(Ini untuk menghibur di bulan puasa)

 

Jual Otak

Ini sa ambil dari Cepos Online: (dgn sedikit impruv):

Satu kali begini, ada paitua de pu gigi geraham sakit. Su lobang besar macam lobang di aspal. De pu sakit saja! Trus hari itu jam2 2 siang de ada sono. Slep mati! Tau2 ada orang lewat batariak2.

Orang : “Daging…daging…daging sapi. Ikan laut juga ada… Daging..daging”.

Orang ini de pu suara itu …balak sekali sampe…Paitua de kaget bangun, de dengar ada orang batariak jual2 daging sama ikan. Langsung paitua kopu kapala trobos jendela kayu tamba deng de pu manisu.

Paitua : “Hee.. ko pu “otak” ada ka tida, ha!, sa pu gigi ada sakit ini. Jang bikin baribut di sini!!!!”.

Orang : “Ado pace, sa pu “otak” su tarada, yang ada hanya daging paha, sama rusuk”.

Paitua ko tamba meter, dan de angkat palungku!

Paitua : “Cepat ko pigi.. kalo tidak bukan ko pu otak yang pica tapi ko pu kaki juga sa kasi pata!”

Orang ini de takut setenga mati, langsung de kipas!

(Siang2 jam 2 sa tulis ulang mob ini)